புது வருடம்

வாழ்க்கை எனும் நன்செய் நிலத்தில்
தன் நம்பிக்கையை விதையாக விதைத்து
உதவும் எண்ணத்தை உரமாகப் பரப்பி
செழிப்பானச் சிந்தனையை நீராகப் பாய்ச்சி
சரியான உழைப்பைப் பயிராக வளர்த்து
தவறான செயல்களைக் களையாக எடுத்து
உடல் பயிற்சியுடன் ஆரோக்கியத்தை வேலியாக்கி
வளமான வருமானத்தை அறுவடை செய்து
வருடம் முழுதும் வாழ்நாள் முழுவதும்
மிகச் சிறப்பான வாழ்க்கை வழங்க
புத்தொளியோடு மலரட்டும் புதுவருடம்
புது வசந்தமாக வீசட்டும் புதுவருடம்
புது வழிகாட்டியாக வரட்டும் புதுவருடம் !!!

நேரத்தோடு

வினாடிகளோடு நாமும் விரைவோம்
நிமிடங்களோடு நாமும் நீச்சலடிப்போம்
மணிகளோடு நாமும் மாற்றமடைவோம்
நாட்களோடு நாமும் நடப்போம்
வருடங்களோடு நாமும் வளருவோம்
நேரத்தோடு செயல் முடிப்போம்
நேரமில்லையெனும் அவதி நீக்குவோம் !!!

கண்ணீர்

வலியை

வெளிப்படுத்தும் 
வழி !!!

விழி

பொழியும்

துளி !!!

இயற்கை

இயற்கையாக
இருந்தால் இன்னலேது !!!
செயற்கையாக
வாழ்ந்தால் இன்பமேது !!!

இயற்கை

அழகு செழுமை
அளவோடு அனுபவித்தால் !!!
கேடு வறுமை
வரையின்றி அனுபவித்தால் !!!

இயற்கை

ஏற்றத் தாழ்வு
இல்லாமல்
வளம் பகிரும்
வள்ளல் !!!

இயற்கை

அழகு தான்
அழிக்காத வரை !!!

இயற்கை

பகல் இரவு
இரு முகங்கள்
இன்பம் துன்பம்
இரு அனுபவங்கள்
இரண்டும் இயற்கை
நில்லாத மறுசுழற்சி
துன்பத்தில் துவளாமல்
இன்பத்தில் மிதக்காமல்
வாழ்வில் உயரவேண்டும் !!!

இயற்கை

பிறப்பும் இறப்பும்
மாற்ற முடியாதது
இயற்கையின் வலிமை !!!
செயற்கை முயற்சி
கண்டுபிடிப்பு அனைத்தும்
அடங்கும் இயற்கையில் !!!
இயற்கையில் இயற்கை இயற்கை !!!

இயற்கை

அடர் மேகம் அழகாக அந்தி வானம் ஆள
வளர் நிலா இருள் நீக்க வலம் வர
வெளிர் நட்சத்திரம் அளவோடு வெளிச்சம் தர
அதிகாலை வரை விழிப்போடுக் காவல் தொடர 
கதிரவன் கண்ணுறக்கம் விழித்தெழுந்து கடல்  குளித்து
உற்சாகத்துடன் ஒளி வெள்ளம் பாய்ச்ச உயிர்கள் அனைத்தும்
புத்துயிர் கொண்டுப் புதுநாள் காண இயற்கையுடன்
இணை செல்ல உயிர் வாழ உணவு தேடி
உழைக்க வாழ்க்கைச் சக்கரம் வழி விட
பகல் முழுதும் பாடுபடப் பனித்துளி போல்
வியர்வை சொட்ட தண்ணீர் வந்து தாகம் தணிக்க
தென்றல் வந்து வியர்வை விலக்கப் பூமித்தாய்
உணவளி(ள)க்க  உயிர்கள் அனைத்தும் பசியாறப் பகல்
பொழுதும் உறங்கச் செல்லப் பகலவனும் படுக்கச் செல்ல
அடர் மேகம் அந்தி வானம் ஆள  துவங்குகிறது !!!

கஞ்சா

கவலை மறக்கக் கஞ்சா
மன அழுத்தத்திற்குக் கஞ்சா
நுரையீரல் கெடுக்கக் கஞ்சா
புற்றுநோய் கொடுக்கக் கஞ்சா
குடும்ப சீரழிவுக்குக் கஞ்சா 
சாவை அழைக்கக் கஞ்சா
தேவையா கொடுமையான கஞ்சா ???

வெற்றி

அருகில் நெருங்குவது போலத் தோன்றும்
பறக்கும் - தொட முடியாத வானமாய் !!!
தாகத்திற்கு அருந்தலாம் போல இருக்கும்
முடியாது - மறையும் கானல் நீராய்  !!!
நேரிலே நடப்பது போல இருக்கும்
மாறும் - உறக்கத்தில் காணும் கனவாய் !!!
விடாமல் முயன்று கொண்டே இருப்போம்
விரைவில் வெற்றியை விரட்டிப் பிடிப்போம் !!!

தேவர் திருமகனார்

தெய்வீக மனிதர் கிடைப்பது மிகவும் அதிசயம்

வீரத்துடன் விவேகமும் சேர்ந்திருப்பது அதனினும் அதிசயம்

பொறுமையுடன் வள்ளல் குணம் அதனினும் அதிசயம்

பிறப்பும் இறப்பும் ஒரே நாள் அதனினும் அதிசயம்

அனைத்திற்கும் சொந்தக்காரர் தேவர் தெய்வீக அதிசயம் !!!

அவரை வணங்குவோம் வழிநடப்போம் வாகை சூடுவோம் !!!

தேவரினம் மென்மேலும் வளர உயரப் பாடுபடுவோம் !!!

பசும்பொன் முத்துராமலிங்கத் தேவர்

தேனினும் பழக இனிமையானவர்
பாலினும் உள்ளம் தூய்மையானவர்
சிங்கத்தினும் அடங்கா வீரமானவர்
கர்ணனினும் கொடை வள்ளலானவர்
எறும்பினும் உழைப்பில் சுறுசுறுபானவர்
கணினியினும் வேகம் நிறைந்தவர்
சூரியனினும் எதிரியைச் சுட்டெரிப்பவர்
நிலவினும் அன்பால் குளிர்விபவர்
நீரினும் தாகத்தைத் தணிப்பவர்
காற்றினும் சுவாசத்தைக் கொடுப்பவர்
வானினும் மனதில் பெரியவர்
நிலத்தினும் இடம் அளிப்பவர்
தேசியத்தையும் தெய்வீகத்தையும் கண்ணாக
மானத்தையும் மரியாதையையும் காத்த
மனித தெய்வம் தேவர் ஐயாவை
வான்புகழ வணங்கி ஆசி பெறுவோம்
பசும்பொன்னில் அனைவரும் ஒன்று கூடுவோம் !!!

தேவர் திருமகனார்

பசும்பொன்னில் விளைந்த சுத்தத் தங்கம்
பார் போற்றிப் புகழும் சிங்கம்
தேசியமும் தெய்வீகமும் இவரது அங்கம்
அறிவாற்றல் தெரிந்தது நாடு எங்கும்

சீமான் பிறந்தது தேவர் இனம்
மக்களுக்கு நன்மை செய்யும் மனம்
எடுத்த காரியத்தை வெற்றியாக்கும் குணம்
வணங்கி அருள் பெறுவோம் தினம் !!!

ரோஜாப்பூ

இதழ்களை விரித்தாய்
அழகாய்ச் சிரித்தாய்
வண்ணங்களில் மலர்ந்தாய்
எண்ணங்களில் நிறைந்தாய்
கூந்தலில் குடியேறினாய்
மாலைக்கு மணமாகினாய்
நேரமானதும் நினைவிழந்தாய்
இரவானதும் மறைவானாய்
மறுஜென்மம் உருவெடுப்பாய்
மறுசெடியில் ஜனனிப்பாய் !!!

மழை

மனதை நனைக்கும் மழை
மகிழ்ச்சியைக் கொடுக்கும் மழை
செழுமையை வழங்கும் மழை
செல்வதைச் சேர்க்கும் மழை 
வறட்சியை ஒழிக்கும் மழை 
வறுமையை அழிக்கும் மழை
அன்பாய்ப் பெய்யணும் மழை
அழிவில்லாமல் காக்கணும் மழை !!!

சொந்தமாக்கலாம்

பணம், நகை
வீடு, நிலம் மட்டுமல்ல
நினைக்கும் நல்லெண்ணங்களையும்
செய்யும் நற்செயல்களையும்
உதவும் நற்குணத்தையும்
மூளையிலிருந்து உருவாகும்
அனைத்துக் கற்பனைகளையும்
நமது சொந்தமாக்கலாம் !!!
கருத்துகளை அனைவரிடமும்
பகிர்ந்து பந்தமாகலாம் !!!

வாய்ப்பு

கிடைக்கும் போதுக் கட்டிப் பிடிக்கணும்
தூரப் போனா ஓடி அணைக்கணும்
தெரியலைனா சரியாத் தேடித் பார்க்கணும்
வரவுக்குத் தகுதியோடுக் காத்து இருக்கணும் !!!

நிதானம்

நிதானமாக ஓட்டிச் செல்வோம்
நீண்ட ஆயுளை வெல்வோம் !!!

இரவு

நித்திரையைத் துணைக்குத் தேடும் 
களைப்புக் கரைந்து ஓடும் 
மனம் நிம்மதி நாடும்
இமையும் கண் மூடும் 
கனவு நிழல் ஆடும்
உடம்பும் தூக்கம் தொடும்
கவலை மற !!! தூக்கம் திற !!!

என்னவாகும் ???

அந்தப் பக்கம்
இந்தப் பக்கம்
பார்த்தும் தயக்கம்
உடம்பும் வியர்க்கும்
இருந்தும் நெருங்கும்
விருந்தும் வருந்தும்
அருகில் நிற்கும்
உருவில் வெட்கம்
சிரித்தால் சொர்க்கம்
நினைத்தால் திக்கும்
முயற்சி எடுக்கும்
பலன் கொடுக்கும்
கைகள் கோர்க்கும்
மெய்கள் சேர்க்கும்
கட்டி அணைக்கும்
முத்தம் கொடுக்கும்
அடுத்து நினைக்கும்
கதவு திறக்கும்
தூக்கம் கெடுக்கும்
கனவில் மயக்கம்
மனக்கண் விழிக்கும்  
இதயம் தவிக்கும்
நிழலும் நிஜமாகுமா ???
கனவும் நனவாகுமா ???

எங்கே

மூச்சு விட்ட அனல் காற்று எங்கே
வாயில் உதிர்த்த  வார்த்தை எங்கே
கடலில் விழும் நிறமில்லா மழைத்துளி எங்கே
லஞ்சம் வாங்காத அரசு அலுவலகம் எங்கே
புறம் பேசாதப் புதிய ஜீவன் எங்கே
அளக்காமல் வாரி வழங்கிய வள்ளல் எங்கே
எதிர்பாராமல் உதவி செய்யும் உள்ளம் எங்கே
கடவுளின் மறு உருவான கருணை எங்கே
எங்கே??? எங்கே??? எங்கே???

புகைப்பழக்கம்

புகைக்கும் போது மனதிற்கு பேரின்பம்
புண்ணாக்கும் போது நோய்க்கு ஆனந்தம்
புற்றாக்கும் போது வலிக்கு வளைகாப்பு
புதைக்கும் போது குடும்பத்துக்கு பேரிழப்பு !!!

முதியோர் தினம்

அறிவில் முதிர்ந்தவர்கள்
அன்பில் முதிர்ந்தவர்கள்
பண்பில் முதிர்ந்தவர்கள்
பக்தியில் முதிர்ந்தவர்கள்
சக்தியில் முதிர்ந்தவர்கள்
சாதனையில் முதிர்ந்தவர்கள்
அனுபவத்தில் முதிர்ந்தவர்கள்
முதிர்ச்சியான ஆலமரம் மட்டுமே
முழுமையான நிழல் தரும்
முதியோரை ஒதுக்காமல்
அன்பாய் அரவணைப்போம் !!!
அனுபவம் பெறுவோம் !!!
தலை வணங்குவோம் !!!

புகைப்பழக்கம்

அருகிலிருப்பவரையே மறைக்கும் புகை
ஆபத்தைக் கொடுக்கும் வகை
இடுகாட்டில் எரிக்கும் வரை
ஈகை காட்டும் இருட்டறை
உறவுகள் இன்பத்தை அழிக்கும்
ஊரும் உன்னைப்  பழிக்கும்
எங்கும் குடிக்கும் பழக்கம்
ஏனையவரையும் துணைக்கு அழைக்கும்
ஐயமில்லாமல் நிறுத்தணும் புகையை
ஒரு நிலைப்படுத்தணும் மனதை
ஓசியானாலும் வெறுக்கணும் புகைப்பிடியை !!!

காளை

சாதனைக்கு வளரணும் காளை
சோதனைக்குப் பயந்தாக் கோழை

தடம்

கடற்கரையில் எத்தனைப் பாதத்தடங்கள்
உன் பாதத்தின் படிவங்கள்
மனதில் நிற்கும் வடிவங்கள்
உன் வருகையை அறிந்தேன் !!!
புரியவில்லை
எனக்காக வந்து சென்றாயா ???
மாற்றானுடன் மகிழ்ந்து சென்றாயா ???

தோல்விப் பாடம்

பாடம் படித்தால் மட்டுமே
தேர்வில் வெற்றி  பெற முடியம் 
பள்ளிப் பாடம் இது !!!
தோல்வி அடைந்தால் மட்டுமே 
வாழ்வில் வெற்றி அடைய முடியும்
வாழ்க்கைப் பாடம் இது !!!

பிள்ளையார் சதூர்த்தி

அதிசய உருவம் கொண்ட ஐங்கரனே
துதிக்கையோடுத் துன்பம் தீர்க்கும் சிவமகனே
தாய்ப்பற்று அதிகம் கொண்டத் தலைமகனே
ஞானப்பழத்தை அறிவால் அணைத்த ஆண்டவனே
எச்செயல் துவக்கத்திலும் முன்னிற்கும் மூத்தவனே
பக்தர்களைப் பகையிலிருந்து காக்கும் பரம்பொருளே
சதூர்த்தி நாளில் சங்கடங்கள் தீர்த்து
நலத்துடன் இருக்க மக்களை ஆசிர்வதித்து
அனைத்துச் செல்வங்களையும் அள்ளிக் கொடுத்து
அருள்புரிய வேண்டி சண்முகன் சகோதரனே
உன்னை வணங்கிப் பாதம் பணிகிறோம் !!!

வேண்டாம் தற்கொலை

நான் படைக்கவில்லை இந்த உடம்பை
எனக்கு உரிமை இல்லை அழிப்பதற்கு
நான் கொடுக்கவில்லை இந்த உயிரை
எனக்கு உரிமை இல்லை எடுப்பதற்கு
அவசரமான முடிவு அறிவை அடக்கும்
நிதானமான சிந்தனை அழிவைத் தடுக்கும்
பிரச்சனை எதுவானாலும் ஆறவிடு
நேரம் எடு தெளிவு பெறு முடிவு எடு
தற்கொலை எண்ணம் தரணியில் இருக்காது
தைரியமான வாழ்க்கைக் கை வசப்படும்
தற்கொலைக் கண்ணாடியைத் தவற விடு
சுக்கு நூறாகட்டும் தூள் தூளாகட்டும்
நம்பிக்கைக் கண்ணாடியை உறுதியோடு பார்
உலகை வாழ ஆசை உள்ளதகாக் காட்டும்
புத்துணர்ச்சி பெறு புது வாழ்வு துவங்கு 
மானம் போனாலும் ஊனம் ஆனாலும்
நம்பிக்கையை நட்டு வை நல்மரமாக   
முயற்சியோடு உழைப்பெனும் தண்ணீர் ஊற்று
ஆலமரமாக விழுதுகளுடன் பரந்து விரிந்து
பார்புகழப் பரம்பரை வாழுமுன் நிழலில் !!! 
தோன்ற வேண்டும் எண்ணம் மனதில்
இப்படி எல்லாம் எழுதுபவனே இருக்கையில்
நான் ஏன் தற்கொலை செய்யணும்???

எதில் அழகு

பெண்ணவளின் கண்ணசைவிலா
பிஞ்சதுவின் புன்னகையிலா
ஆணவனின் வீரத்திலா
மயிலதுவின் சிறகிலா
வானவிலதுவின் வண்ணத்திலா
நிலவதுவின் வெண்ணொளியிலா
மொட்டதுவின் மலர்ச்சியிலா
அருவியதுவின் வீழ்ச்சியிலா
வயலதுவின் பசுமையிலா
தீபமதுவின் சுடரொளியிலா
மனமதுவின் நல்லெண்ணத்திலா
நாக்கதுவின் நாணயத்திலா
செயலதுவின் சிறப்பிலா
உழைப்பதுவின் உண்மையிலா
எதில் அழகு ???

இனிமை - தனிமை - கொடுமை

அவள் வந்த பின் சேர்ந்தது
அவள் சென்ற பின் வந்தது
அவள் செல்லும் போது சிரித்தது
சும்மா.....ஹி ஹி ஹி !!!

உதவி

உதவி செய்வோம்
ஊனமுற்றவருக்கும்
உறவிழந்த முதியவருக்கும்
உறவில்லா அனாதையர்க்கும்
கல்விக்குக் காசில்லாக் கண்மணிகளுக்கும் !!!

பெண்மை

ஆசை எனும் அலை பாய
பாசம் எனும் படகு ஆட
ஆண்மை எனும் அனல் விழ
மோகம் எனும் மேகம் சூழ
பேதை எனும் பெயர் வர
கூச்சம் எனும் குரல் எழ
காமம் எனும் கதிரை
தாகம் எனும் தவிப்பை
பேராண்மை எனும் பெண்மை
மேன்மை எனும் மென்மையோடு
கட்டுப்பாடு எனும் கருவியால்
ஆசை எனும் அதை அடக்கம் செய்கிறது !!!

லட்டு

உதிரிப் பூந்திகள் தனித் தனியாயிருக்க 

உறவைத் தேடி உள்ளம் வாட

நெய் எனும் சுவையூட்டும் விருந்தாளி 

நெருக்கத்தை ஏற்படுத்த நேரம் ஆக

ஒன்றுக்கொன்று கைப்பிடிக்க  உருண்டை

வடிவில் உருவானது இனிப்பான பந்தம் !!! 

தேவையானத் துட்டு செலவு செய்தால்

அனைவர் நாவுக்கும் இது சொந்தம் !!!

ஆசிரியர்

வார்த்தைகளைத் தெளிவாகவும்
அர்த்தங்களை அழகாகவும்
சூத்திரங்களைச் சுருக்கமாகவும்
பாடங்களைக் கருத்தோடும்
புரியாததைப் புன்முறுவலோடும்
அறியாததை அகமகிழ்வோடும்
பணிவைப் பக்குவமாகவும்
பண்பாட்டை நிச்சயமாகவும்
முயற்சியை முக்கியமாகவும்
மரியாதையை மகிழ்ச்சியோடும்
கற்றுக் கொடுக்கும் கல்விக் கடவுள் !!!

பார்க்காதவன்

வீட்டில் மனைவியை அழகாய்ப் பார்க்காதவன்
வெளியில் வேசியை வெறுப்பாய் பார்க்காதவன்
சமுதாயத்தில் மானம் மரியாதையைப்  பார்க்காதவன்
நண்பரின் அறிவுரையைப் ஆராய்ந்து பார்க்காதவன்
அரசின் விளம்பரப் பலகையைப் பார்க்காதவன்
காண்டம் எனும் பாதுகாப்பைப் பார்க்காதவன்
எந்த விளைவையும் பெரிதாய் பார்க்காதவன்
வாழ்வில் எய்ட்ஸ்-ஐ நிச்சயம் பார்ப்பானோ ???

பருவ காலங்கள்

கோடையில் விழும் கடும் இடியில் 
வந்து விழுந்தாய் என் மன மடியில் 
கார்காலத்தில் பெய்யும் மழைத் துளியில்
கண்காட்சியாய் நிறைந்தாய் என் கரு விழியில்
வசந்தத்தில் வரும் தென்றல் காற்றில் 
கலந்து ஓடினாய் என் இரத்த ஊற்றில்  
பனிக் காலத்தில் பொழியும் பனியில்
உரமாக உறைந்தாய் என் உயிர் நுனியில்
இலையுதிர் காலத்தில் உதிரும் இலையில் 
சருகாய் உதிர்ந்தாய் என் இதய வலையில்
இனியக் காலச்சக்கரம் மீண்டு(ம்) வருமென்று 
காத்திருக்கிறேன் என் உயிர் கொண்டு !!!

விலை

பொருளுக்கு மதிப்பு கொடுக்கும் விலை
அதிகமாய் விற்பது வியாபாரியின் கலை
நியாயமான விற்பனை நிச்சயம் கற்பனை
விலை உயர்த்தி விற்பவருக்கில்லை மனம்
வாடிக்கையாளர் உள்ளம் வருந்தும் தினம்
அனைத்து வணிகத்திலும் வேண்டும் நேர்மை
விற்கும் பாலில் வேண்டும் தூய்மை
அநியாய விற்பனையில் பணம் சேரும்
மனநியாய விற்பனையில் அருள் சேரும்
உழைப்பில் அடையலாம் உயர்ந்த நிலை
பொருளுக்குத் தேவைப் பொருத்தமான விலை
விரைவில் பணம் சேர விலையுயர்த்தாதே
பணத்தோடு பாவமும் படிப்படியாய்ச் சேரும்
வணிகம் பண்ணனும் சரியான விலையில்
வாழ்க்கை உயரும் தெளிவான நிலையில்
ஒவ்வொரு பொருளுக்கும் உகந்த விலை
வாங்குபவர் மனதில் இன்ப அலை
பொருள் விலையுடன் சரியான லாபமும்
வணிக நெறிகளையும்  வலிமையாக இணைத்து
வீதிக் கடைகளில் விற்பனை செய்வோம்
வியாபாரத்தின் நேர்மையை கடைப் பிடிப்போம்
மக்கள் மனதார வாங்க வாழ்த்த வழி செய்வோம் !!!

சுதந்திர தினம்

சூரியனுக்கு இரவில் சுதந்திரமில்லை
சந்திரனுக்கு பகலில் சுதந்திரமில்லை
பளிச்சென்ற பகலிலும் பனிவிழும்
இரவிலும் முப்பொழுதிலும் எப்பொழுதிலும்
இந்தியனுக்கு சுதந்திரம் உண்டு !!!
ஆங்கிலேயனிடம் அடிமையானது அறியாமையினால்
வளமையை விட்டது புரியாமையினால்
மிஞ்சியவற்றை அந்நியனுக்கு விற்காமல்
இநதிய வளர்ச்சிக்கு இயற்கையை
அழைத்து மரியாதை செய்து
வளம் பெருக்கி வானுலகம்
போற்ற வல்லரசாக்கி இந்தியாவை
இமயமெனத் தூக்கி நிறுத்துவோம்
பெற்ற சுதந்திரத்தைப் போற்றுவோம்
அனைவருக்கும் பயனுள்ளதாய் மாற்றுவோம் !!!

சுதந்திர தினம்

அடிமைச் சிறையில் இருந்து
விடுபட்டுச் சுதந்திரமாய்ப் பூமித்
தாயின் மடியில் இந்தியா
எனும் பிள்ளை பிறந்தநாள் !!!

சுதந்திர தினம்

சுபாஸ் போன்ற சூரியன்கள்
காந்தி போன்ற கண்ணியவான்கள்
நேரு போன்ற நியாயவாதிகள்
போராடிப் பெற்றச் சுதந்திரத்தை
போற்றி வணங்குவோம் இத்தினத்தில் !!!

சுதந்திர தினம்

லஞ்சமில்லா அரசு அலுவலகங்கள்

வஞ்சமில்லா நாடாளும் அரசியல்வாதிகள்

பஞ்சமில்லா வீட்டுக் குடிமக்கள்

பயமில்லா வாழ்க்கைப் பாதைகள்
திண்டாட்டமில்லா வேலை வாய்ப்புகள்
கொண்டாட்டமில்லா போதைப் பொருட்கள்
இதெல்லாம் பெற வரம்
தரவேண்டும் சுதந்திர தினம் !!!

கண்ணீர்

கண்ணுக்குத் தெரியாத

வலியையும் வேதனையையும்

வெளிப்படுத்தக் கண்களால் 

உருவாக்கப்படும் தண்ணீர் !!!

உற்பத்தியான உடன்

அருவியாய்க் கொட்டும்

கன்னம் எனும்

மலை முகடுகளிலிருந்து !!!

இவ்வருவியில் மட்டும்

நீர்வரத்துக் குறைய  

விரும்பும் மனம் !!!

வறண்ட அருவி

வருத்தமில்லா வாழ்வு !!!

நீரில்லா அருவி

நிம்மதியான வாழ்வு !!!

ஆனந்தம் எனும்

அருவி அவ்வப்போது

அளவோடு வந்தால்

அருமையான வாழ்வு !!!

உதடு

வாயிற்காவலன் !!!

நண்பர்கள் தினம்

நகைக்கும் நட்பு
பகைக்கும் நட்பு
கொடுக்கும் நட்பு
எடுக்கும் நட்பு
கெடுக்கும் நட்பு
தடுக்கும் நட்பு
அடிக்கும் நட்பு
அணைக்கும் நட்பு
மறக்கும் நட்பு
மதிக்கும் நட்பு
அனைத்துக்கும் காரணம் நட்பு !!!
நட்பில் பெறலாம் பலம்
முடிவில் யாவையும் நலம்
கொண்டாடும் இத்தினமோ சுகம் !!!

நண்பர்கள் தினம்

தாய் இல்லாமல் பிள்ளை இல்லை
நண்பர் இல்லாமல் வாழ்க்கை இல்லை !!!

நண்பர்கள் தினம்

இல்லாத போது கொடுக்கவும்
அழும் போது அணைக்கவும்
விழும் போது எழவும்
வாழும் போது வாழ்த்தவும்
கூடிய உன்னத நட்பால்
உள்ளங்கள் கொண்டாடும் தினம்
மகிழ்ச்சியில் திளைக்கும் மனம் !!!

நன்றி

உதவியதற்கு உடனடியாக
உதடுகளில் உதிப்பது !!!

கிருமி

உத்தரவு இல்லாமல் உடம்பில் நுழைந்து  

உண்ணும் உணவில் உடல் வளர்த்து

உயிரைக் குடிக்கும் நம்பிக்கைத் துரோகி !!!

வாரிசு

குழந்தை இல்லாத

குறையில் தினமும்

மனம் நோகாமல்

பரந்த மனதுடன்

அனாதை இல்லம்

சென்று பிடித்த  

பிள்ளையை  அணைத்தெடுத்து

அன்பு காட்டி

வளமான வாழ்வு

கொடுத்து சரியான

வாரிசை உருவாக்கலாம் !!!

வாழ்வில் நிம்மதி பெறலாம் !!!

காதல்

இதயம் துடிப்பதற்கு
மட்டும் தானே ???
உன்னால் பறக்கிறதே !!!

பிளாஸ்டிக்

பிறந்தாலும் தொல்லை
பிணமானாலும் தொல்லை !!!

உன்னைப் போல் ஒருவன்

நான் தோற்கப் பிறந்தவன் அல்ல
வெற்றியை நோக்கி விடாமல் ஓடுபவன் !!!

கோபம்

கோபத்தைக் கொல்வோம்

வாழ்க்கையை வெல்வோம் !!!

பொழுதுபோக்குக் காதல் ???

கண்ணில் துவங்கி

அன்பில் மயங்கி

கனிவில் கனிந்து

அணைப்பில் அயந்து

பேச்சில் வியந்து

பணத்தை இழந்து
நேரம் கடந்து

முடிவில் பார்த்தல் மணி ஐந்து !!!

வீட்டுக்கு ஓட வேண்டும் பயந்து !!!

நோ லாஜிக் !!! சும்மா !!!

வேண்டும் ஈழம் - தமிழ் ஈழம் - தனி ஈழம்

வெந்து வீணான விளை நிலங்கள்

வெறுமையாய் இருக்கும் வெடியில் வீழ்ந்த வீடுகள்

குண்டுகளால் சிதைந்த வாகனம் பார்க்காத சாலைகள்
கட்டடம் களவு போன மருத்துவ மனைகள்

ஆதிகால மனிதர்களாய் உடுக்க உடுப்பின்றி

பிச்சைக்காரர்களாய் உண்ண உணவின்றி
அனாதைகளாய் அன்பாய் அணைக்க உறவின்றி

அடிமைகளாய் அவதியுடன் சுதந்திர உணர்வின்றி

கொலைக் கைதிகளாய் விடுதலை நீதியின்றி
பருந்துக்குப் பலியாவோமோ எனும் பயத்தில் குஞ்சுகளாய்     

கம்பி வேலிகளுக்கு நடுவில் கவலையோடு

முள் வெளிகளுக்கு மத்தியில் முகவரியில்லாமல்

குழந்தை அழுகுரல் ஆங்காங்கே தாயைத் தேடி

மனைவி ஓலம் ஊரெங்கும் கணவனைத் தேடி

பெண் விசும்பல் வீடெங்கும் தந்தையைத் தேடி

முதியோர் கதறல் வீதியெங்கும் பிள்ளையைத் தேடி

குருவிக்கு நல்ல கூடுண்டு தங்க

சிங்கத்துக்கு குகையுண்டு ஓய்வு எடுக்க

மீனுக்கு நீர் நிலையுண்டு வாழ

ஐந்தறிவு ஜீவனுக்கு அமைதியான இடமுண்டு

ஆறறிவு மக்களுக்கு அணுவளவில் உறைவிடமில்லை  

 

 

நெஞ்சைப் பிளக்கும் வஞ்சகத் திட்டம்

அப்பாவிகளைக் கொல்ல அடுக்கடுக்காய் ஆலோசனை

பக்கத்து நாடுகளுடன் படுகேவலமான பரிபாலனை
பாலில் விஷம் கலக்க பன்முகப் பேச்சு

ஆண் மகனை அடித்து
அசைய முடியாமல் அம்மணமாக்கி
கண்ணைக் கட்டி காவளித்தனமாக
பின் புறமிருந்து பிடரியில்
துப்பாக்கியால் சல்லடையாகத் துளைத்து

தமிழ்ப்பெண் மகளைத் தரமில்லாமல்
மனிதாபமில்லாமல் மானபங்கப்படுத்தி
தன் தாய் மனைவி மகள் அக்கா தங்கையாக
நினைக்காமல் அட்டூழியம் செய்து
சின்னாப் பின்னமாகச் சிதைத்து
சித்திரவதை செய்து பிணமாக்கி

ஒன்றும் அறியாக் குழந்தைகளை
துப்பாக்கி முனையில் தூங்கவைத்து
துணியில்லாமல் துவம்சம் செய்து
உணவில்லாமல் உருக்கி எடுத்து
அன்னை அன்பில்லாமல் அரவணைப்பிலாமல்
அனாதைகளாக்கி அடிமைகளாக்கி

வெள்ளைக்கொடி காட்டி வந்த வேந்தர்களை
வெடிகுண்டு போட்டு வேரோடு
வெற்று உடல்களாக சிதறச் செய்து
போர் மரபை மீறியப் பொட்டைகள் (நரிகள்)
வெறி நாய்கள் சொறி நாய்கள்

தவறான வழியில் தமிழ் மக்களை
தகுதியல்லாத கயவர்கள் தடுமாறச் செய்தது
தோல்வியல்ல சரியான துவக்கம் தான்
வெற்றி திலகத்தை வேகமாக வென்றிட
வேற்று மனமாக இல்லாமல் வேற்று நாடு
எனும் மாறுபட்டக் கருத்தில்லாமல் தமிழன்
தரணியில் எங்கிருந்தாலும் ஒன்றாக இணைந்து
மாற்றுக் கருத்துக்கு செவி சாய்க்காமல்
மாற்று எண்ணமுள்ள செந்தமிழ் மக்களை
ஒரே கருத்தில் ஒருங்கிணையச் செய்து
உலகம் உண்மையை உணர உழைத்து
ஐ.நா-வை அணுகி அநியாயத்தை எடுத்தியம்பி
தமிழ் ஈழத்தின் முக்கியத்தை முன்வைத்து

வாதாடி நீதியை நிலை நாட்டி
வாழையடி வாழையாகத் தமிழர்கள் தனி நாட்டில்
நிம்மதியாக நிர்பந்தமின்றி வாழ
சுதந்திரமாகச் சுற்றி வாழ
உற்சாகமாக உழைத்து வாழ
சகலமும் பெற்று சந்தோசமாக
வாழப் பெற வேண்டும் தனி ஈழம் !!!
தமிழர் ஈழம் !!! தரமான ஈழம் !!! தன்னிகரில்லா ஈழம் !!!
ஒன்று படுவோம் !!! தோள் கொடுப்போம் !!!
வென்றிடுவோம் !!! ஈழம் பெறுவோம் !!!

தோல்வி

விஷயம் இருக்கிறது ஒவ்வொரு தோல்வியிலும் 

விஷமாக நினைத்து உயிரை விடாதே
விஷயத்தை அறிந்து தெளிந்து கொண்டால்
விருதுகள் பல நம்மைத் தேடி வரும்
விழுதுகளாய் உன் வம்சம் வளம் பெறும் !!!

சாலை விபத்து - விதிகள்

சாலை விதிகள் சாவைக் குறைக்கும் சக்திகள் !!!

விபத்தைத் தடுக்கலாம் விதிகளை மதித்தால் !!!

தலைக்கவசம் தன்னுயிர் காக்கும்
தன்னுயிர் தன்னுறவு காக்கும் !!!

போதையில் வாகனம் ஓட்டுவது 
பயணிகளுக்குத் தகனம் காட்டுவது !!!

போதையில்லா  வாகன ஓட்டுதல்  
விபத்தில்லாப் பாதையைக் காட்டுதல்  !!!

சாலை விதிகளை மதிப்போம்
சந்தோசமான பயணத்தைக் கொடுப்போம் !!!

சாலை விதிகளை மதிப்போம்
வரும் சங்கடங்களைத் தடுப்போம் !!!

நீ தானே என் பொன் வசந்தம்

நீ தானே என் பொன் வசந்தம்
நீங்காத நினைவுகளே நம் காதல் சுகந்தம்
நீ தானே என் கண் விழி
நீங்காத நினைவுகளே நம் கனவு மொழி
நீ தானே என் இதய துடிப்பு
நீங்காத நினைவுகளே நம் உறவின் பிடிப்பு
நீ தானே என் வாழ்க்கைப் பாதை
நீங்காத நினைவுகளே நம் பிரிவில் போதை
நீ தானே என் வாழ்வின் சிகரம்
நீங்காத நினைவுகளே நம் அன்பின் அகரம்
நீ தானே என் வலிக்கு மருந்து
நீங்காத நினைவுகளே நம் மனதுக்கு விருந்து
நீ தானே என் பொன் வசந்தம்
நீண்ட காலம் வாழ வேண்டும் நம் காதல் மகரந்தம் !!!

கணக்கு

சரியாகப் போட்டால் தப்பாகாது
தப்பாக போட்டால் விடையாகாது
விடை இல்லையென்றால் மதிப்பாகாது
மதிப்பு இல்லையென்றால் உயர்வாகாது
உயர்வு இல்லையென்றால் வாழ்வாகாது
நல்ல வாழ்வு வேண்டுமா ???
சரியாகப் போடு கணக்கை !!!
சும்மா !!! ஜாலிக்கு !!!

நாகரிகம்

அன்பை அளவோடும்
அழுவதை அமைதியாகவும்
சிரிப்பதை சிக்கனமாகவும்
வார்த்தைகளை அளந்தும்
இயற்கையை செயற்கையாகவும்
இயல்பை இல்லாததாகவும்
செய்வதா நாகரிகம் ???

காதல் ரசனை

அழகை ரசிக்கலாம் அளவில்லாமல்
உன்னைக் கூட அதிக நேரம் ரசிக்கிறேனே ???
ஓ ! காதல் தான் காரணமோ ???
சும்மா .... ஹஹஹஹா !!!

கோபம்

நவரசங்களில் இதைக் குறைத்து விட்டால்
வாழ்க்கை முழுதும் கிடைக்கும் பழரசம் !!!

நிழல்

பாகுபாடு இல்லாமல் அனைத்திற்கும்
ஒளியினால்  கிடைக்கும் மறு உருவம் !!!

விமானம்

 யார் சொன்னது மீனுக்குத் தண்ணீர் மட்டுமே வாழ்விடமென்று ???
ஆகாயத்தில் மீன் அற்புதமாய் பறக்கிறதே !!!

பேஸ்புக் காதல்

பேஸ்புக்கில் பார்த்தேன் இந்தப் பேதையை

அவள் நட்பை பெற ஆசைப்பட்டேன்

நயமாய் add request ஒன்றை அனுப்பினேன்

acceptence-ஐ அரை மணிகொருமுறை தேடினேன்

ஆறு நாட்கள் ஆகியும் ஆறுதலான answer இல்லை  

ஆறு வருடமாக கடந்தது நெஞ்சை கனமாக்கியது   

ஏழாவது நாளில் திறந்தது அந்த ரோஜா தோட்டம்

பூக்களால் நிறைந்தது என் மன வாட்டம்

நாளொரு like-க்கும் பொழுதொரு comments-சும்மாக 

நட்பு என்பது நல்லதொரு அன்பானது

அன்புக்கு மகுடமாய் பூத்தது புதுக்காதல்

படங்கள் பரிமாற்றம் பரிச்சியமானது

இரவு மட்டும் கண்ணில் பட்ட பேஸ்புக்

கைபேசியில் முந்தியது முக்கியமானது

எதிலும் பெண்களுக்கே முன்னுரிமை

காத்திருந்தேன் அந்த கனவுச் செய்திக்காக

காணவில்லை அந்தக் கன்னியிடமிருந்து

அழகாய் திட்டினேன் அந்த ஓவியத்தை

அருமையாய் புகுத்தினேன் ஆசையை

கனிவாய் வெளிப்படுத்தினேன் காதலை

ஆசையாய் post செய்தேன் என் மனதை wait செய்தேன்

கன நேரத்தில் கிடைத்தது பதில் ஓவியம்

அந்த யுவதியும் காத்திருந்தாள் போல 

படத்தில் இருந்தது படபடக்கும் இதயம்

திறந்தாள் இதயத்தை பறந்தாள் காதல் வானில் 

அங்கே காத்திருந்தது என் இதயம்

இணைந்தது இதயம் வந்தது புது உதயம்

பின்னாளில் பேஸ்புக்கில் profile படம் மாறியது

என்னில் அவள் அழகும் அவளில் என் ஆண்மையும்

உயிரில்லா பேஸ்புக்கில் உருவானது புது உறவு

உறவை மறவோம் வாழ்நாள் முழுதும்

நன்றி சொல்வோம் பேஸ்புக்கிற்கு !!! 

தொடர வேண்டும் இதன் சேவை

கிடைக்க வேண்டும் users தேவை !!!

இரத்த தானம்

தேவைக்குக் கொடுக்கலாம் குருதி

மோட்சம் பெறலாம் உறுதி !!!

சத்தம்

அமைதியின் அருமையை அறிவுறுத்துவது !!!

கவிதை

கற்பனை
விளைநிலத்தில்
தைமாதம் !!!

வெயில்

சூரியனின் சூடான பிள்ளை
கொஞ்ச இயலாத கிள்ளை !!!
சுட்டெரிக்கும் வளர்ப்புடன் மழலை
இது தேடவைக்கும் நிழலை !!!

இன்டர்நெட்

சிலந்தியை விட விவரமாகப் பின்னப்பட்ட வலை
தகவல்களை விரைந்து கொடுக்கும் தங்க அலை !!!

வேலை

நம் வயிற்றுக்கு வேலை கொடுக்க
நாம் பார்க்க வேண்டும் வேலை !!!

முடியுமா ???

தண்ணீரைக் கயிறால் கட்டப் பார்த்தேன்

கண்ணீரைக் கண்ணுக்குளே அடக்கப் பார்த்தேன்
விண்மீனை வலை வீசிப் பிடிக்கப் பார்த்தேன்
கடல் மீனை விரல் விட்டு எண்ணப் பார்த்தேன்
அழகான அருவியை அணைக்கப் பார்த்தேன்
கனலான நெருப்பை நறுக்கப் பார்த்தேன்
உயர்கின்ற வயதைக் குறைக்கப் பார்த்தேன்
பிரிகின்ற உயிரைப் பிடிக்கப் பார்த்தேன்
முடியவில்லை !!! வழி என்ன தெரியவில்லை !!!
விவரம் தெரிந்தும் விவகாரமான முயற்சி !!!

அழகு நிலா

கொடுப்பது
வெளிச்சம் மட்டுமல்ல
உடம்பில் குளிர்ச்சி
மனதில் மகிழ்ச்சி
நினைவில் நெகிழ்ச்சி
உறவில் கிளர்ச்சி
வாழ்வில் வளர்ச்சி !!!

மானிட்டர் - மானிட்டர்

தெளிவாய்க் காட்டும் இந்தக் கணினியின் பகுதி

தெளிவை ஓட்டும் இந்தத் திரவத்தின் மிகுதி !!!

காதலா ???

மனசோடு மனசு

இளசோடு இளசு

பரிவோடு பரிவு

கனவோடு கனவு

உறவோடு உறவு

பிரிவோடு பிரிவு

நினைவோடு நினைவு !!!

தவிப்பு

டிவி சீரியலில் நாளை என்னவாக இருக்கும் என்பதை அறிய - தாய்க்குலம்

டாஸ்மாக் கடை எப்போது திறக்கப்படும் என்று - குடிமகன்

எப்பொழுது பாய் பிரண்ட் பைக்கில் பிக்-அப் செய்வான் என்று - இளைஞி

வகுப்பறை முடியும் கணத்தை எதிர்பார்த்து - கல்லூரி மாணவன் !!!

எனக்குத் தெரிந்த சில மேலே உள்ளவை

உங்களுக்குத் தெரிந்தவற்றையும் கீழே உள்ள comments-ல் எழுதுங்கள் !!!

வரதட்சணை

அம்பாள் கொடுப்பது வரம்
அதற்கு நாம் அன்பாய்க் கொடுக்கிறோம் தட்சணை !!!
குடும்பம் தலைத்தோங்க வரம் தர வரும்
இந்த அம்மனிடம் மட்டும் ஏன் கேட்கிறோம் தட்சணை ???
மாறவேண்டும் இந்த ம(ப)ணமுறை
மாற்றவேண்டும் வருகிற தலைமுறை !!!

வெயில்

வெப்பக் கதிர்கள் கண்ணுக்குத் தெரிவதில்லை
தாக்கத்தின் கொடுமை "சன்"னுக்கு புரிவதில்லை !!!
வெளிச்சம் கொடுக்கும் ஒளி வெள்ளம்   
உனக்கேன் இந்த சுட்டெரிக்கும் உள்ளம் ???

தாய்

தண்ணீர் குடிக்க மறந்தாலும்

தாயைக் கவனிக்க மறவாதே !!!

அம்மா

நிதானமான உணவு

நிம்மதியில்லா நித்திரை

கடினமான வலி

கனிவான கவனிப்பு

கருவறையிலுள்ள கருவுக்காக !!!

அன்பான அணைப்பு

ஆரோக்கியமான பாலூட்டு

இனிமையான தாலாட்டு

சிரத்தையோடு சீராட்டு

அழகான கைக்குழந்தைக்காக !!!

தவழ்வதை ரசிப்பது  

நடக்க பழக்குவிப்பது  

பேச பயிற்றுவிப்பது

சரியான உணவளிப்பது  

வளரும் பருவத்தில் !!!

பழக்கவழக்கம் பரிசளித்து

பள்ளிசெல்லப் பழக்கி

உடல்நலம் பேணி

ஒழுக்கத்தை அடித்தளமாக்கி

வாழ்க்கையில் வழிகாட்டுவது 

பள்ளிப் பருவத்தில் !!!

மனப்போக்கில் கட்டுப்பாடு

அளவான அறிவுரை 

தெளிவான சிந்தனை 

சிறப்பான செயல்பாடு

பண்பாட்டை வலியுறுத்துவது 

இளமைப் பருவத்தில் !!!

குடும்பத்தின் பெருமை

பொறுமையின் உரிமை  

அரவணைக்கும் அருமை 

பாசத்தின் இனிமை

கண்டிப்பின் வலிமை

முதுமைப் பருவத்தில் !!!

பலவேறு பரிமாணத்தில்

ஆண்டவணனின் பலமுகமாய்

பகலிரவு பாராமல்

தனக்கென வாழாமல்

மகர்கென வாழும் 

மனித தெய்வம் அன்னை !!!

தாயின் கண்ணில்

தவறியும் நிரில்லாமல் 

மனம்நிறை மகிழ்ச்சியை 

மறவாமல் நிறைப்பது

நம் கடமை !!!

பசியில்லாமல் வளர்த்த

அமுதசுரபியான அன்னை

வாய் சோற்றுக்காக

கலங்கக் கூடாது கண்ணை   !!!

நாம் நிம்மதியாய் தூங்கத்தன்  

மடியை படுக்கையாக்கியது தாய்

வயோதிகத்தில் வாழ்விடம்

தேடி அலையவிடாமல்

தன்மடியில் வாழவைக்கணும் சேய் !!!

அன்னை நம் வாழ்க்கை !!!

அன்னை நம் உயிர் !!!

அன்னை நம் தெய்வம் !!!

பாதம்

உடம்பில் எடை  

பூமியில் தடை

தாங்கும் இடை !!!

பாதி

அன்பு பாதி அறிவுரை பாதி

நம்பிக்கை பாதி நல்லுழைப்பு பாதி

சந்தோசம் பாதி சங்கடம் பாதி

உணவு பாதி உடற்பயிற்சி பாதி

புரிந்துதவி பாதி புண்ணியம் பாதி

மருந்து பாதி மனக்கட்டுப்பாடு பாதி
உறவு பாதி உரிமை பாதி

அவள் பாதி அவன் பாதி

சரி பாதி !!! சரிவில்லா வாழ்வு !!!

மே தினம்

வருடத்தில் ஒரு தினம்

வருமானம் கொடுப்பதை  வாழ்த்தும் சனம்

மே மாதம் முதல் தினம்

மேன்மையான உழைப்பை நினைக்கும்  கணம்

சித்திரையில் ஒரு தினம்

சிகரம் தொட உழைக்க நினைக்கும் மனம் 

உழைப்பாளர்களுக்கு ஒரு தினம்

உழைத்தால் நிச்சயம் கிடைக்கும் பணம்
கடின உழைப்பு !!!   கஷ்டமில்லா வாழ்வு !!!

உண்மையான உழைப்பு !!!   உயர்வான வாழ்வு !!!
உழைப்போம் !!!   உச்சியைத் தொடுவோம் !!!

மே தினம்

வாழத் தேவை குருதி  

உழைக்கத் தேவை உறுதி !!!  

வாழ்க்கைக்குத் தேவை தனம்  

உழைப்புக்குத் தேவை மேதினம் !!!

ஜெ.ஜெயலலிதா

நடிகையாய் முதலில் அறிமுகமாகி 
ரசிகர்கள் மனதில் ரதிமுகமாகி  
மக்கள் திலகத்தின் மறுமுகமாகி
தமிழகம் முழுதும் தனிமுகமாகி
எதிரிகள் நடுங்க எரிமுகமாகி 
முழு வெற்றிக்கு உயிர்முகமாகி

ஜொலிக்கும் தமிழகத்தின் தங்கமுகம் !!!

விடுங்க

புகை பிடித்தலை விடுங்க
புற்றுநோய் வருதலைத் தடுங்க
மதுக் குடித்தலை விடுங்க
உடல் அழிதலைத் தடுங்க
விலைமாது தொடுதலை விடுங்க
எய்ட்ஸ் அணைத்தலைத் தடுங்க
கெட்டப் பழக்கத்தை விடுங்க
வரும் கெடுதலைத் தடுங்க
குடும்பத்துக்கு நல்ல வாழ்க்கை கொடுங்க !!!

பரதேசி

பயணிக்க நல்ல வாகனம் தேவையில்லை
கால்களே சிறந்த சக்கரம் இந்த மனிதருக்கு
உடுக்க உடை தேடாது இந்த உடம்பு
தன் தோலையே உடுப்பாய் நினைக்கும் இவர் மனது
விதவிதமாக உணவுகள் பல கிடைத்தாலும்
ருசிக்கு முக்கியம் கொடுக்காது இவர் நாக்கு  
குடும்ப உறவுகள் ஆயிரம் இருந்தாலும்
அனைத்து உயிரையும் தன் உறவாகக் கருதும் இனம்
வாழ்வில் பிடிப்பில்லாமலும்
இன்ப துன்பங்களை சுவைக்காமலும்
நடந்த தூரத்தை நினைக்காமலும்
நடக்கும் தூரத்தை கருதாமலும்
தேசமெங்கும் திரிந்து சென்று
இவர் தேடுவது தான் என்ன ???
செய்யும் காரியமோ உண்டாக்கும் சிரிப்பு
அதில் உள்ளர்த்தமோ ஆயிரம் இருப்பு
மற்றவர்களின் பதிலோ சுடும் நெருப்பு 
அனைத்தையும் சகித்துக் கொள்வது இவரின் தனிச்சிறப்பு
எளிதாகப் புரிய முடியாத புத்திசாலிகளோ ???
பரதேசி எனப் பலகுரல் திட்டினாலும்
பாராட்டாய் பட்டமாய் எடுத்துக் கொண்டு
பகலிரவு பாராமல் நினைவை நிலைப்படுத்தி
ஆண்டவனுக்கு அரும் தொண்டாற்றிடும்
ஆண்டவனின் அருட்ப் பிள்ளைகளோ ???

தேவர் இனம்

வீரத்தை விதைப்பவர்கள்

வேலியாய்க் காப்பவர்கள்
பயத்தை வேரருப்பவர்கள்
பகையாளியைக் கருவறுப்பவர்கள்
வேங்கையை மிஞ்சியவர்கள்
வேலால் மிரட்டுபவர்கள்  
அடிமைத்தனத்தை  அறுப்பவர்கள்
அன்புக்குப் பணிபவர்கள்
எவனுக்கும் பயமில்லை !!! எமனுக்கும் பயமில்லை !!!

செருப்பு

பாதங்கள் முத்தமிடவில்லையென்றால் பயணிக்காது 
முத்தமிட்ட நன்றிக்காகப் பாதங்களைப் பிணியாக்காது !!!

பேருந்து ஓட்டுனர்

விசிலடித்தால் மட்டுமே

வேலை நடக்கும் இவரிடம் !!!

வார்த்தைகள்

நம் தரத்தை மற்றவர் அளக்க உதவும் அளவுகோல்
அடுத்தவரின் மனக் கதவைத் திறக்க உதவும் திறவுகோல் !!!

திருட்டு

அன்பைத் திருடும் சந்தேகம் 

அறிவைத் திருடும் ஆத்திரம்
நட்பைத் திருடும் தவறான புரிதல்
ஆரோக்கியத்தைத் திருடும் நோய்
உழைப்பைத் திருடும் சோம்பல்
முன்னேற்றத்தைத் திருடும் முயற்சியின்மை
வயதைத் திருடும் வருடம்

வாழ்க்கையைத் திருடும் மரணம் !!!

மகளிர் தினம்

பாகுபாடு இல்லாமல் ஆணையும்
பெண்ணையும் கருவில் சுமந்து
உயிர் கொடுத்து உணவு கொடுத்து
சுவாசம் கொடுத்து சுகம் கொடுத்து
வண்ணம் கொடுத்து வளர்ச்சி கொடுத்து
மிகக் கடினமான வலியுடன் பெற்றெடுத்து
இரவு பகல் பார்க்காமல் கண் முழித்து கவனித்து
உண்ணும் உணவில் ஒரு பகுதியை
உணவாக உற்பத்தி செய்து பாலாக
பச்சிளம் குழந்தைக்கு  பக்குவமாய் புகட்டி
அழுகையிலிருந்து அர்த்தங்களைப் புரிந்து
நோயிலிருந்து காப்பாற்றி கண்ணேறிலிருந்து காத்து
பேசக் கற்றுக் கொடுத்து
பழகும் முறையைப் பயிற்றுவித்து 
பள்ளிக்குப் போகும் பழக்கத்தை பதியவைத்து
வாழ்க்கையையும் கற்க உதவி செய்து
இளமைப் பருவத்தை கண்ணியமாகவும்
கற்புடனும் கடக்க கண்காணித்து
திருமணத்திருக்கு பின் வாழ்க்கையில் இன்ப
துன்பங்களை பகிர்ந்து துணையாய் நின்று
முழு மனதுடன் முழுதாய் அர்ப்பணித்து
மனித வாழ்க்கையின் துவக்கம் முதல் 
முடிவு வரை வரும் இந்த உன்னதப் பெண் உறவு
ஆண் வர்க்கம் போற்ற வேண்டிய இனிய வரவு
எப்பிறப்பிலும் சிறந்தது பெண்ணின் பிறப்பு
சொல்லி மாளாது இதன் தனிச்சிறப்பு
பெண்களைப் போற்றுவோம் !!!
பெண் உரிமைகளைக் காப்போம் !!!
பெண்களை மேலும் உயர்த்துவோம் !!!
வாழ்த்துவோம் !!! வணங்குவோம் !!!

குடை

தற்காலிக நிழல் தரும்
தரு இது வெயில் காலத்தில் !!!
தலை நனையாமல் தடுக்கும்
தலைகீழ் தாமரை இது மழைக் காலத்தில் !!!

இழப்பு

வேலை செய்ய மறந்தால்
வருமானம் இழப்பு
கொடுத்த வாக்கு மறந்தால்
மதிப்பு இழப்பு
உடை உடுக்க மறந்தால்
மானம் இழப்பு
உயிர் காக்க மறந்தால்
மனிதம் இழப்பு
உதவி செய்ய மறந்தால்
புண்ணியம் இழப்பு
செய்த நன்றி மறந்தால்
கண்ணியம் இழப்பு  
நல்ல நண்பனை மறந்தால்
மாபெரும் இழப்பு
மூச்சு விட மறந்தால்
உயிர் இழப்பு
நாம் மறப்பதை மறந்தால்
இழப்பை இழக்கலாம் !!!

சாலையில் விபத்து

ஏதாவது அடி பட்டிருக்கிறதா என்று

தன் வண்டியைச் சுற்றிச் சுற்றி ஆய்வு
வண்டியில் அடிபட்ட உடம்பு துடித்து ஓய்வு

வலி புரியாத வண்டியைத் தடவிக் கொடுத்தல்

வலியால் துடிக்கும் உடம்பை அவமதித்தல்

உயிரற்ற பொருளை பெறலாம் உடைந்தால்  

நேரம் ஆனால் பெற முடியாது உடம்பு சிதைந்தால்
மனித உடம்புக்குக் கொடு முன்னுரிமை
அவர் சந்ததியும் மறவாது உன்னருமை !!! 

கத்தி

கூராக இருக்கும்

சீராகப் பிரிக்கும் !!!

கொலைவெறி - கொலவெறி

தமிழைக் கொல்வதில் தமிழ் நடிகைகளுக்கு

தமிழர் விவசாயத்தைக் கொல்வதில் கேரளனுக்கு

தமிழனைக் கொல்வதில் சிங்களனுக்கு !!!

காதல்

இளமை வயலில் ஏதோ குறை 

இது வந்ததும் செழிப்பு நிறை !!!

காதல்

உடலின் அனைத்து உணர்ச்சிகளையும் உணர வைக்கும்

உள்ளத்தின் அனைத்து உணர்வுகளையும் புரிய வைக்கும் !!!

இதுவும் காதல் தான்

அன்பு

ஆறுதல்

இன்பம்

ஈர்ப்பு

உரிமை

ஊடல்

எதிர்ப்பு

ஏளனம்

ஐயம்

ஒடுக்கம்  

ஓட்டம்

ஔளோதான்

ஹி ஹி ஹி !!!

பயம்

இருக்க வேண்டும் பயம்

மற்றவரைத் துன்புறுத்த 

மற்றவருக்குத் துரோகம் செய்ய !!!

தவறு

தவறு செய்யாத மனிதன் இல்லை

தவறு மட்டுமே செய்தாலும் மனிதன் இல்லை !!!

நல்லது - வல்லது

நாளை என்பது சோர்வுக்கு நல்லது

இன்றே முடிப்பது வாழ்க்கைக்கு வல்லது  !!!

கணினி மௌஸ்(mouse)

உள்ளங்கை அசைவுக்கு ஓடோடி வருபவன்

விரல் அழுத்தத்திற்கு விரைந்து செயல்படுபவன்

அம்புக் குறியால்  ஆணையை அமல்படுத்துபவன் !!!

வெற்றி

நேரடி வெற்றி  விடை பெற நேறும்

தோல்விக்குப் பின் வெற்றி தொடர்ந்து ஏறும் !!!

தேங்காய்

கொண்டை போனால்  
மண்டை உடையும் !!!

தமிழ் எழுத்துக்கள்

உயிரெழுத்து - 12 

மெய்யெழுத்து - 18 

உயிர்மெய்யெழுத்து - 216 
ஆயுதயெழுத்து -  1 
அப்ப.....

தலையெழுத்து எத்தனை ???

அறிவுரை

அடுத்தவருக்கு இலவசமாக

யாரும் வழங்கக்கூடிய 

ஒரே பொன்னுரை !!!

ஓவியர்

கற்பனையைக் கருவாக்கி

கருத்தை உருவாக்கி

கைவிரலைக் கணையாக்கி 

காகிதத்தைக் களமாக்கி

உருவத்தைப் படைக்கும்

மகத்தான படைப்பாளி !!!

குடியரசு தினம்

இந்நாளில் மக்களாட்சி மலர்ந்தது

மக்களுக்கு விடிவுகாலம் பிறந்தது

உரிமைகளின் சிறகு விரிந்தது

அடிமைகளின் அழுகை ஒழிந்தது

ஓட்டின்(வாக்கு) வலிமை தெரிந்தது

நிலையான ஆட்சி வந்தது

தேவையை கேட்க முடிந்தது 

ஒவ்வொன்றாய் வந்து சேர்ந்தது

பல்துறை  வளர்ச்சி பணிந்தது

வல்லரசும் வருவதில் இணைந்தது

குடிமக்கள் மனதை அடைந்தது

உழைப்போம் ! உயர்வோம் ! வல்லரசாவோம் !!!பாரதக் குடியரசின் புகழைப் பாரெங்கும் பரப்புவோம் !!!

குடியரசு தினம்

மக்களின் ஆட்சி மலர்ந்த தினம்

ஆள்பவர்களை முடிவு செய்வது மக்கள் மனம்

ஆட்சியில் அமர்ந்த பின் மக்களுடன் சினம்

அரசியல்வாதி எண்ணம் எப்போதும் பணம்

சரியாக வேண்டும் இவர்கள் குணம் !!!

இருக்கணும்

அளவில்லாமல் இருக்கணும் உதவி செய்வதில்

அளவோடு இருக்கணும் உணவு உண்பதில்

சுழியமாக இருக்கணும் துரோகம் இழைப்பதில்

சுறுசுறுப்பா  இருக்கணும் உழைக்கும் நேரத்தில்

கவனமாக இருக்கணும் முடிவு எடுப்பதில் 

கண்டிப்புடன் இருக்கணும் வேலை வாங்குவதில்

பொறுப்புடன் இருக்கணும் பெற்றோர் எதிர்பார்ப்பில்

பாடமா இருக்கணும் சந்ததி படிக்கையில்

வேண்டி இருக்கணும் ஆண்டவன் சன்னதியில் !!!

சிலம்பம்

கம்பின் சுழற்சி
நமக்குப் பயிற்சி
காக்கும் முயற்சி !!!

சோதனை

சாதனைக்காக !!!

நகம்

முடியும் இடத்தில இருப்பது

உணர்ச்சி நரம்புகளைக் காப்பது

வாழும் வரை வளர்வது

வண்ணம் எதையும் ஏற்பது

விரலுக்கு அழகு சேர்ப்பது !!!

கணினி சாட்(chat)

புவி முழுதும் புது உறவு 

இன்டர்நெட் மூலம் இனிய வரவு !!!

கண்தானம்

விழி கொடுப்பதில் முழித்திருப்போம்
வீழ்ந்த பின்னும் விழித்திருப்போம் !!!

முருகப் பெருமான்

அறுபடை வீடு உடையவர்
அன்பருக்கு அள்ளித் தருபவர்

மலை கடல் அமர்ந்தவர்

மக்கள் பிணித் தீர்ப்பவர்
தமிழர்க்கு மட்டுமே உரியவர்
தன்னிகரில்லா இளையவர் !!!

முயற்சி

தினமும் முழிப்பதற்கு எடுக்கும் முயற்சி  முதல் வெற்றி
அடுத்தடுத்த முயற்சிகளில் பெறலாம் அடுக்கடுக்காய் வெற்றி
முயற்சி செய்க! முறையான வழியில்! மூச்சு இருக்கும் வரை !!!

மாட்டுப் பொங்கல்

உழவுக்கு உதவும் உன்னத உறவுக்கு
உழவர்கள் உவகையுடன் உருவாக்கியது !!!

தைப்பொங்கல்

தை மாதம் பிறப்பது
தமிழ் மக்களுக்காக வருவது
புதியதைப் புகுத்தப் புறப்படுவது
இயற்கைக்கு மரியாதை செய்வது
காளைகளுக்கு கௌரவம் அளிப்பது
நண்பர் உறவினர் ஆசியுடன் மகிழ்ச்சியைப் பரிமாறுவது !!!

வியர்வை

ஓ !  உடம்பும் அழுகிறதோ ???

மின்சாரம்

உயிர் அற்றதை இயக்கும்
உயிர் உள்ளதை எரிக்கும்  !!!
கண்ணால் காண முடியாது
இது இல்லாமல் இரவு விடியாது !!!

அந்திப் பொழுது

இந்த நேரத்தில் அனைத்தும் அழகுதான்
ஆபத்தானது !!! இளமையே ஜாக்கிரதை !!!

நடிகர் விவேக்

கள்ளிப்பால் எதிர்ப்பு
மூடநம்பிக்கை  ஒழிப்பு
அடிமைத்தன அழிப்பு 
சமுதாயச்சண்டைக்கு நெருப்பு
முன்னேற்றத்திற்கு அழைப்பு  
சிரிப்புக்குப் பொறுப்பு
திரையில் காமெடிக் கல்விக்கூடம் !!!

குப்பைத்தொட்டி

சுற்றுப் புறத்தைச்  சுத்தப்படுத்தும் தொட்டி
மாற்றுப் பெயரில் அழைக்கலாமே - சுத்தத்தொட்டி !!!

லஞ்சம் - கையூட்டு

கையெத்தில்லாமல்
கண்ணியமில்லாமல்
கணக்கில்லாமல்
களவாணி கறக்கும் காசு !!!

கண்தானம்

கண் மறுக்காது மற்றொரு
உடம்புடன் பணிசெய்ய !!!
மனம் ஒத்துக் கொண்டால்
கண்தானம் செய்ய !!!

மண்பானை

யாரவது கைவிட்டால்
உயிரையே விட்டுவிடும் !!!
பெண்களை விடத் தன்மானமோ ???

குங்குமப் பொட்டு

இரத்தத்திலிரிந்து தயாரிக்கபட்டதோ ?
இரத்தத்திற்குச் சமமான மரியாதை

சுமங்கலிப் பெண்ணிடமிருந்து !!!

கணினி சாப்ட்வேர் log

ஏதாவது log  இருக்கிறதா

நம் வாழ்க்கைக்கு !!!
ஏதாவது தவறு நேர்ந்தால்
பார்த்து சரி செய்ய !!!

தலைமுடி

தலையில் இருக்கும் போது அலங்காரம்
இல்லாதவர்கள் மனதில் பெரும் பாரம் !!!
இளமையை அளப்பதற்கு இதுவும் ஒரு அளவுகோல்
கல்யாண வீட்டுக்கு இதுவும் ஒரு திறவுகோல் !!!

நம்பிக்கை

வலக்கையா?
இடக்கையா?
தும்பிக்கையா?
இது வெறும் கையல்ல
வெற்றிக்கு உதவும் கை
இது விடும் கையல்ல
விட்டதைப் பிடிக்க   உதவும் கை
இது விலக்கும் கையல்ல
நல்லவற்றை இழுக்கும் கை  
இது அடிக்கும் கையல்ல
வாழ்க்கையை அணைக்க உதவும் கை
இது தாக்கும் கையல்ல
வாழ்க்கையின் விளிம்பில் இருப்பவர்களைக் காக்கும் கை
கண்ணுக்குத் தெரியாதது
கடவுளுக்கு இணையானது !!!

காதல் கல்யாணம்

இளமை எனும் பாதையில் நடந்த போது
நட்பு எனும் ஏரி குறுக்கிட
நண்பர்கள் எனும் சந்திப்பில் இணைய
காதல் எனும் படகு ஈர்க்க
காதல் பயணம் ஆரம்பமானது ஏரியில்
அற்புதமான  பயண முடிவில் அடையுமிடம்
கல்யாணம் எனும் நந்தவனம் !!!

பேருந்து நடத்துனர்

இவர் கொடுத்தால் மட்டும்
கிழிந்த துண்டுச் சீட்டுக்குக்
கூடத் துட்டுக் கொடுப்போம் !!!

கண்ணாடி

அழகைக் கூட்ட உதவுவதில் முதலில் இது
தினமும் இதைப் பார்க்காத முகம் எது ???

தலையணை

அடிக்கவும் அணைக்கவும் !!!

விநாயகப் பெருமான்

கிழக்குப் பார்க்க அமர்ந்தவர்
கிறங்கா மனம் கொண்டவர்
விக்கி போட வைப்பவர்
வினையைத் தீர்க்க விரைபவர்
பொறுமையைக் கற்றுத் தருபவர்
பெருமையைப் பெற்றுக் கொடுப்பவர்
முதற்கடவுள் !!! மூத்தவர் !!! முன்னிருப்பவர் !!!

பூத்தது புதியது

பூத்தது புதியது
இணைந்தது இனியது
வருவது வளமது
தருவது தனமது
சூழ்வது  சுகமது !!!